1Ki 4 | NdeIBE | STEP | Ngakho uSolomoni wabusa lonke elako-Israyeli.

1 Kings 4

Iziphathamandla Labosibalukhulu BakaSolomoni

1 Ngakho uSolomoni wabusa lonke elako-Israyeli. 2 Njalo ababeyizikhulu embusweni wakhe yilaba: U-Azariya indodana kaZadoki – umphristi;

3 u-Elihorefu lo-Ahija, amadodana kaShisha ababengonobhala; uJehoshafathi indodana ka-Ahiludi – umlondolozi wemibhalo;

4 uBhenaya indodana kaJohoyada – umlawuli omkhulu; uZadoki lo-Abhiyatha – bengabaphristi;

5 u-Azariya indodana kaNathani – ekhangele izikhulu zeziqinti; uZabhudi indodana kaNathani – engumphristi njalo engumcebisi osekhwapheni lenkosi;

6 u-Ahishari – umlawuli wasesigodlweni, u-Adonirami indodana ka-Abhida – ekhangele izichaka.

7 USolomoni wayelezinye njalo izikhulu zeziqinti ezilitshumi lambili ezazikhangele ngokuqoqwa kokudla kwenkosi lomndlunkulu. Kwakusithi isikhulu ngasinye silethe okwaso okwenyanga eyodwa ngomnyaka. 8 Nanka amabizo alezozikhulu: uBheni-Huri – ephethe isiqinti samaqaqa ezweni lika-Efrayimi;

9 uBheni-Dekheri – esiqintini seMakhazi, leShayalibhimu, leBhethi Shemeshi kanye le-Eloni Bethihanani;

10 uBheni-Hesedi – esiqintini se-Aru-bhothi (eSokhohi lakulo lonke ilizwe leHefari kungummango wakhe);

11 uBheni-Abhinadabi – esiqintini seNaphothi Dori (yena wayethethe uThafathi indodakazi kaSolomoni);

12 uBhayana indodana ka-Ahiludi – esiqintini seThayanakhi leMegido, lasezindaweni zonke zeBhethi Shani phansi kweZarethani ngaphansi kweJezereli, kusuka eBhethi Shani kusiya e-Abheli Mehola kusuka lapho kuyengena ku-Abheli Mehola kuquma kuyengena kuJokhomimi;

13 uBheni-Gebha – eRamothi Gileyadi (imizana kaJayiri indodana kaManase eGileyadi kwakungokwakhe, kanye lesiqinti se-Agobhu eBhashani kuhlanganisa lamadolobho amakhulu angamatshumi ayisithupha alemiduli lamasango avalwa ngezivalo ezenziwe ngemigqala yensimbi yethusi);

14 u-Ahinadabi indodana ka-Ido – eMahanami; 15 u-Ahimazi – eNafthali (wayethethe uBhesamathi indodakazi kaSolomoni); 16 uBhana indodana kaHushayi – ko-Asheri lako-Alothi;

17 uJehoshafathi indodana kaPharuya, ko-Isakhari; 18 uShimeyi indodana ka-Ela – koBhenjamini; 19 uGebheri indodana ka-Uri – eGileyadi (elizweni likaSihoni inkosi yama-Amori kanye lelizwe lika-Ogi inkosi yeBhashani). Kwakunguye kuphela umbusi wesiqinti.

Isabelo SikaSolomoni Sokudla Kwensuku Zonke

20 Abantu bakoJuda labako-Israyeli babebanengi okwesihlabathi solwandle; babesidla, benatha njalo babejabula.

21 USolomoni wabusa kulo lonke kusukela ezweni leMifula kusiya kwelamaFilisti, kuze kube semingceleni yeGibhithe. Wonke amazwe la ayethela njalo abuswa nguSolomoni okwempilo yakhe yonke.

22 Okwakufanele kudliwe esigodlweni sikaSolomoni nsuku zonke kwakubalisa ifulawa elicolekileyo elilingana amakhora angamatshumi amathathu lempuphu elingana amakhora angamatshumi ayisithupha, 23 inkabi ezinonisiweyo ezilitshumi lenkomo ezingamatshumi amabili, ezivela emadlelweni, izimvu lezimbuzi ezilikhulu ngaphandle kwempala lemiziki lempunzi lengalukhuni ezinonisiweyo. 24 Ngoba yena wabusa phezu kwemibuso entshonalanga koMfula, kusukela eTipisa kusiya eGaza, njalo kwakulokuthula kuzo zonke lezo zindawo. 25 Ngesikhathi sokubusa kukaSolomoni kuze kufike ekufeni kwakhe elakoJuda lako-Israyeli, kusukela kuDani kusiya kuBhiyesheba, abantu babehlezi bevikelekile, kungulowo lalowo emthunzini wesihlahla sakhe sevini loba esomkhiwa.

26 USolomoni wayelezindawo zezinqola zempi eziyizinkulungwane ezine, njalo wayelamabhiza azinkulungwane ezilitshumi lambili.

27 Izikhulu zesiqinti, sinye ngasinye ngenyanga njengamalungiselelo, kwakumele zizophisane ukulethela iNkosi uSolomoni ukudla lemfanelo yakhe lababezokwethekelela esikhosini. Izikhulu lezi zazinanzelela kakhulu ukuthi akukho lokukodwa okusilelayo esikhosini. 28 Izikhulu zaziletha njalo isabelo sazo sengqoloyi lotshani bamabhiza ezinqola zempi lamanye amabhiza.

Ukuhlakanipha kukaSolomoni

29 UNkulunkulu wanika uSolomoni ukuhlakanipha lombono womzwangedwa, lengqondo ejulileyo ebanzi engelinganiswe okunjengetshebetshebe lokhumbi lolwandle.

30 Ulwazi lukaSolomoni lwalujule ukwedlula olwezazi zonke zaseMpumalanga, njalo lujule ukwedlula ulwazi lonke lwaseGibhithe.

31 Wayehlakaniphe ukwedlula wonke amadoda, kubalwa kanye lo-Ethani umEzra – ehlakaniphe ukwedlula uHemani, loKalikoli loDada, amadodana kaMaholi. Njalo udumo lwakhe lwazwakala ezizweni zonke ezazakhelene laye.

32 Wabumba izaga ezizinkulungwane ezintathu kanti njalo izingoma zakhe zaba yinkulungwane eyodwa lezinhlanu. 33 Wachasisa wahaya izihlahla, kusukela isihlahla somsedari waseLebhanoni lomhisophi okhula emidulini. Wafundisa njalo langezinyamazana lezinyoni, ezingahlali emanzini kodwa zingehluleki ukuphila khona lezinhlanzi. 34 Amadoda ayequbuka evela emhlabeni wonke ukuthi azozizwela ukukhalipha kwengqondo kaSolomoni, wonke lamadoda amanye evela khonapho lamanye evela ezizweni, eza ukuzakuzwa lokhukuhlakanipha.